Í kvöld verða leiknir 2 leikir í Iceland Express deild kvenna og einn leikur í 1. deild karla.

Í Hveragerði tekur Hamar á móti Keflavík. Keflavík hefur enn ekki tapað leik í deildinni en Hamar hefur aðeins unnið einn leik. Það má þó ekki vanmeta Hamar á heimavelli sínum. Hamar náði mikilvægum stigum í deildinni í fyrra með því að sigra Keflavík í Hveragerði. Leikurinn hefst klukkan 19:15.

KR fær Grindavík í heimsókn í DHL-Höllina klukkan 20:00. Þessi lið eru jöfn í 3.- 4. sæti deildarinnar en bæði lið hafa unnið 3 leiki og tapað 2. Það má því búast við hörkuleik í Vesturbænum í kvöld.

Einn leikur verður í 1. deild karla í kvöld þegar Haukar taka á móti Þór úr Þorlákshöfn. Bæði lið fóru hægt af stað í deildinni en hafa unnið síðustu leiki sína. Þór hefur unnið 2 leiki í röð en Haukar hafa sigrað síðustu þrjá leiki sína í deildinni. Leikurinn hefst klukkan 21:00 í kvöld.