Í kvöld verða 4 leikir í Iceland Express deild karla og einn leikur í Iceland Express deild kvenna.

Hjá konunum mætast Valur og Hamar í Vodafonehöllinni. Þessi lið eru bæði án stiga í Iceland Express deildinni eftir að hafa tapað fyrstu fjórum leikjum sínum. Það má því búast við mikilli baráttu hjá báðum liðum í kvöld. Leikurinn hefst klukkan 20:00.

Í Grindavík tekur Grindavík á móti Skallagrím. Grindavík er í öðru sæti deildarinnar en Skallagrímur í 6.-9. sæti með 2 sigra í 5 leikjum. Allur ágóði af leiknum mun renna til fjölskyldu Mörtu Guðmundsdóttur, fyrrverandi leikmanns Grindavíkur og Keflavíkur, en hún lést á mánudaginn.

Í Stykkishólmi mætast Snæfell og Tindastóll. Snæfell byrjaði illa og tapaði fyrstu þremur leikjum sínum en hafa síðan unnið síðustu tvo leiki. Tindastóll hefur aftur á móti leikið nokkuð vel í fyrstu leikjum tímabilsins.

Njarðvík fær Stjörnuna í heimsókn í Ljónagryfjuna. Njarðvíkingar unnu fyrstu þrjá leiki sína en töpuðu næstu tveimur gegn Keflavík og KR. Bæði lið hafa skipt um erlenda leikmenn nýlega en það er ekki komið á hreint hvort nýjir leikmenn spili í kvöld.

Í Seljaskóla taka ÍR-ingar á móti Fjölni. Bæði lið hafa byrjað frekar hægt og eru eflaust staðráðin í að landa mikilvægum sigri í kvöld.

Allir leikirnir í Iceland Express deild karla hefjast klukkan 19:15.

Í 2. deild karla verður einn leikur þegar ÍA tekur á móti HK á Akranesi. Leikurinn hefst klukkan 19:30.