Iceland Express deild karla hefst í kvöld með fjórum leikjum. Deildin verður sett klukkan 19:15 í DHL höll KR þegar Íslandsmeistarar KR taka á móti Fjölni.

KR-ingar stefna að því að sýna leikinn beint á netinu í gegnum heimasíðuna sína. Hægt er að lesa umfjöllun um leikinn á heimasíðu KR.

Í Njarðvík taka heimamenn á móti Snæfell. Snæfell eru nýkrýndir Powerademeistarar og Njarðvíkingar hafa verið eitt af sterkustu liðum landsins í gegnum tíðina. Þetta ætti því að verða spennandi leikur. Karfan.is ætlar að vera með beina textalýsingu frá leiknum.

Á Akureyri taka nýliðar Þórs á móti Bikarmeisturum ÍR. Þór var með mikla yfirburði í 1. deild karla á síðasta tímabili og hafa undirbúið sig vel fyrir komandi tímabil. Á heimasíðu Þórs má lesa góða umfjöllun um leikinn.

Tindastóll fer í Hveragerði og mætir Hamri. Þessi lið voru í mikilli baráttu um síðasta sætið í úrslitakeppninni í vor. Hamar hafði betur þar og teflir fram svipuðu liði og síðasta vetur. Þeir hafa þó aðeins styrkt hóp sinn fyrir veturinn. Lið Tindastóls hefur tekið umtalsverðum breytingum frá síðasta tímabili og það verður fróðlegt að sjá hvernig þeim á eftir að ganga í kvöld.

Á morgun lýkur svo fyrstu umferð deildarinnar þegar Stjarnan tekur á móti Skallagrím og Keflavík fær Grindavík í heimsókn.

Allir leikirnir hefjast klukkan 19:15.