Haukar komust í kvöld í úrslit Powerade bikarkeppninnar þegar þær unnu sigur á Val 70-47. Þær mæta því annað hvort Grindavík eða Keflavík en viðureign þeirra stendur nú yfir í Laugardalshöllinni.

Valur byrjaði betur í leiknum og náði góðri forystu um miðjan fyrsta leikhluta. Haukar vöknuðu þá og náðu að jafna metin áður en leikhlutanum lauk.

Annar leikhluti var nokkuð jafn en Haukar áttu góðan kafla undir lok fyrri hálfleiks og komust sex stigum yfir. Þær leiddu 33-27 í hálfleik.

Í síðari hálfleik voru Haukar betri aðilinn. Þær juku forskot sitt jafnt og þétt og lönduðu öruggum sigri.

Kristrún Sigurjónsdóttir var stigahæst hjá Haukum með 19 stig. Hún tók einnig 6 fráköst og stal 6 boltum í leiknum. Telma Fjalardóttir skoraði 10 stig og tók 11 fráköst í leiknum.

Hjá Val átti Signý Hermannsdóttir góðan leik en hún skoraði 9 stig, tók 16 fráköst, varði 9 skot og stal 5 boltum í leiknum.