Rússar urðu í gærkvöldi Evrópumeistarar þegar þeir unnu Spánverja í æsispennandi úrslitaleik.

Jon Robert Holden skoraði sigurkörfuna með stökkskoti þegar 2,1 sekúnda var eftir af leiknum. Pau Gasol fékk tækifæri til að stela sigrinum á lokasekúndunum en skot hans fór ekki ofan í. Rússar sigruðu því leikinn 59-60.

Andrei Kirilenko var valinn maður keppninnar en hann var stigahæstur í úrslitaleiknum með 17 stig. Kirilenko var með 18 stig, 8,6 fráköst og 2,4 stoðsendingar að meðaltali í Evrópukeppninni.

Litháen vann bronsverðlaun eftir að þeir unnu sigur á Grikkjum 69-78. Litháar tryggðu sér þar með sæti á Ólympíuleikunum 2008.