Íslenska karlalandsliðið mætir Austurríki í Laugardalshöll á miðvikudaginn klukkan 19:15. Þetta er síðasti leikur liðsins í riðlakeppni b-deildar Evrópukeppninnar.

Með sigri á morgun getur Ísland komist upp fyrir Austurríkismenn og í þriðja sæti riðilsins. Íslenska liðið tapaði fyrir Austurríki í fyrri umferðinni 85-64 þar sem Austurríkismenn stungu af á seinustu mínútum leiksins.

Benjamin Ortner var mjög erfiður við að eiga í þeim leik en hann skoraði 32 stig, tók 13 fráköst og varði 7 skot í leiknum. Það má segja að Ortner og Bernd Volcic, sem skoraði 28 stig gegn okkur í Austurríki, séu aðalmenn liðsins en þeir eru báðir 205 cm á hæð og sterkir undir körfunni.

Íslensku strákarnir hafa sýnt í síðustu leikjum að þeir geta varist gegn hávaxnari mönnum og ættu því að vera klárir í slaginn á morgun.

Við hvetjum alla til að mæta í Laugardalshöllina á morgun og styðja íslenska landsliðið til sigurs.

Hægt er að kaupa miða á midi.is eða á eftirtöldum stöðum:

Skífan Laugavegi
Skífan Kringlunni
Skífan Smáralind
BT Akureyri
BT Akranes
BT Egilsstaðir
BT Hafnarfjörður
BT Ísafjörður
BT Selfoss