Í haust munu karla og kvennalandslið Íslands í körfubolta leika í Evrópukeppni landsliða. Þetta verður seinni hluti keppninnar sem að liðin tóku þátt í síðasta haust.

Íslenska kvennaliðið mun leika einn leik heima í haust og tvo erlendis. Ísland mætir Hollandi 1. september klukkan 16:00 að Ásvöllum. Holland er taplaust í riðlinum en Ísland var mjög nálægt því að vinna í Hollandi. Lokatölur leiksins voru 61-66.

8. september mun liðið svo mæta Noregi á útivelli og 15. september munu stelpurnar leika lokaleikinn gegn Írum á Írlandi.

Íslenska karlalandsliðið á eftir að leika tvo heimaleiki og einn útileik. Laugardaginn 25. ágúst mun liðið mæta Finnum á útivelli. Miðvikudaginn 29. ágúst, klukkan 20:15 mun liðið svo taka á móti Georgíu í Laugardalshöll. Í liði Georgíu eru nokkrir þekktir leikmenn, sá þekktasti þeirra er Zaza Pachulia sem hefur verið að gera það gott í NBA deildinni.

Miðvikudaginn 5. september klukkan 20:15 mun liðið svo taka á móti Austurríki í Laugardalshöll í lokaleik liðsins þetta haustið.

Íslensku liðin ætla sér að ná góðum árangri í leikjunum í haust, Íslenska karlaliðið er nýbúið að ná í gullið á Smáþjóðaleikunum og ná vonandi að fylgja þeim árangri eftir.

Allir heimaleikirnir verða í beinni útsendingu á RÚV.