San Antonio Spurs urðu í nótt NBA meistarar þegar þeir sigruðu Cleveland Cavaliers 83-82 í fjórða leik liðanna. San Antonio vann því einvígið 4-0.

Tony Parker var valinn leikmaður úrslitanna en hann skoraði tæplega 25 stig og var með 57% skotnýtingu í úrslitunum.

Þetta er fjórði NBA titillinn sem að San Antonio vinnur síðan árið 1999. Þeir unnu 58 leiki í deildarkeppninni, lögðu svo Denver, Phoenix og Utah á leiðinni í úrslitin þar sem að þeir fóru létt með Cleveland.

San Antonio var með frumkvæðið í leiknum í kvöld fyrir utan stuttan kafla í fjórða leikhluta þegar Cleveland náði 12-0 spretti. San Antonio náði þó að komast aftur yfir með frábærum körfum frá Manu Ginobili. Þeir náðu síðan nokkrum mikilvægum sóknarfráköstum og nýttu vítaskotin sín vel í lok leiksins.

Manu Ginobili var stigahæstur í kvöld með 27 stig, Tony Parker skoraði 24 stig og tók 7 fráköst og Tim Duncan skoraði 12 stig og tók 15 fráköst.