Í kvöld mun koma í ljós hverjir munu mætast í úrslitum ACB deildarinnar á Spáni.

Topplið deildarinnar Tau Ceramica mætir liði Barcelona á heimavelli sínum. Barcelona, sem að voru í fjórða sæti deildarinnar, komust 2-1 yfir í einvíginu en Tau náði að jafna metin í síðasta leik.

Í hinni viðureigninni mætast Real Madrid og DKV Joventud. Real varð í öðru sæti deildarinnar í vetur og Joventud í því þriðja. Real Madrid náði, líkt og Tau Ceramica, að jafna einvígið og tryggja sér oddaleik með sigri í síðasta leik.

Þarna mætast fjögur efstu lið spænsku ACB deildarinnar, sem er af mörgum talin ein sú sterkasta í Evrópu. Þetta eru því sannkallaðir stórleikir og það verður mjög áhugavert að sjá hverjir komast í úrslitin.

Í liðunum eru margir þekktir leikmenn. Þar má m.a. nefna menn eins og Juan Carlos Navarro, Luis Scola, Ricard Rubio, Axel Hervelle og Felipe Reyes.