Úrslitaeinvígi NBA deildarinnar hefst í nótt klukkan 1:00 í San Antonio. Þar mætast San Antonio Spurs og Cleveland Cavaliers. Leikurinn verður í beinni útsendingu á Sýn.

San Antonio Spurs þykja sigurstranglegri í þessu einvígi en þeir unnu 58 af 82 leikjum sínum á leiktímabilinu. Síðan lögðu þeir Denver Nuggets, Phoenix Suns og Utah Jazz á leið sinni í úrslitin. San Antonio hefur unnið þrjá titla síðan 1999 og hefur stjörnur eins og Tim Duncan, Tony Parker og Manu Ginobili í leikmannahópi sínum.

Cleveland Cavaliers komu mörgum á óvart með því að komast alla leið í úrslit deildarinnar. Þeir unnu 50 leiki á tímabilinu en töpuðu 32. Í úrslitakeppninni lögðu þeir Washington Wizards, New Jersey Nets og Detroit Pistons að velli og komust þar með í úrslit NBA í fyrsta sinn í sögu félagsins. Með Cleveland Cavaliers leikur LeBron James, sem að er orðinn einn þekktasti leikmaður heims í dag. Hann hefur leikið frábærlega í úrslitakeppninni og vakti mikla athygli þegar hann skoraði 48 stig í 5 leik einvígisins gegn Detroit.

Það er ljóst að San Antonio mun leggja mikla áherslu á að stoppa LeBron James í þessu einvígi. Það mun því mikið mæða á meðspilurum James í Cleveland liðinu. Flestir körfuboltasérfræðingar telja að þeir verði að leika vel til þess að Cleveland eigi möguleika á að vinna NBA titilinn.

Það er á hreinu að körfuboltaáhugamenn eiga í vændum frábæra skemmtun enda tvö af sterkustu liðum deildarinnar að mætast þarna.

Scottie Pippen spáir í spilin

Bill Russell ræðir um úrslitaeinvígið

Myndbrot úr úrslitum NBA deildarinnar.