Norðurlandamót unglingalandsliða heldur áfram í dag og eiga íslensku liðin öll einn leik hvert.

18 ára lið kvenna ríður á vaðið kl. 9 að íslenskum tíma þegar þær mæta Dönum. Stelpurnar eiga ekki möguleika á að komast í úrslitin, en vinni þær Dani í dag eða Norðmenn á morgun eru þær komnar í leikinn um þriðja sætið.

Klukkan 15 leikur 18 ára lið karla við Finnland og 16 ára lið kvenna við Svíþjóð. Bæði lið hafa átt erfitt uppdráttar á mótinu en eru staðráðin í að gera betur. Það verður því fróðlegt að sjá hver uppskeran verður hjá liðunum.

Klukkan 17 er það svo 16 ára lið drengja, en þeir mæta Dönum. Danska liðið er mjög sterkt, en það er einmitt þjálfað af Thomasi Fjoldberg, sem þjálfaði hjá Breiðablik fyrir skemmstu. Það má því búast við hörkuleik í dag.

Hægt er að fylgjast með beinni textalýsingu af leikjunum á netinu.