Nú er úrslitakeppni NBA hafin og spennan farin að magnast í mörgum einvígum. Úrslitakeppninni fylgja einnig heiðursveitingar sem að gefnar eru fyrir liðið tímabil.

Nú þegar er búið að veita verðlaun fyrir besta 6. manninn, þjálfara ársins, mestu framfarirnar, varnarmann ársins og nýliða ársins. Varnarlið deildarinnar var einnig kynnt í byrjun vikunnar.

Nú í dag var Brandon Roy, leikmaður Portland Trailblazers, valinn nýliði ársins. Roy var stigahæstur og stoðsendingahæstur nýliða í vetur með 16,8 stig og 4 stoðsendingar að meðaltali í leik.

Marcus Camby, leikmaður Denver Nuggets, var valinn varnarmaður ársins. Camby hefur verið einn af betri varnarmönnum deildarinnar um árabil, en hefur þó aldrei verið valinn varnarmaður ársins áður. Hann varði flest skot allra í NBA í vetur, 3,30 að meðaltali í leik. Camby tók einnig 11,7 fráköst og stal 1,24 boltum að meðaltali í leik.

Það er hægt að lesa um verðlaunahafa tímabilsins á heimasíðu NBA deildarinnar.