Víkurfréttir fengu fjölmiðlaverðlaun KKÍ, sem veitt voru á lokahófinu um síðustu helgi.

Hannes S. Jónsson sagði við afhendingu verðlaunanna að umfjöllun um körfuknattleik hefði almennt verið góð í vetur. Þar má nefna frábærar útsendingar hjá Sýn frá úrslitakeppni karla og beina útsendingu RÚV frá fjórða leik í úrslitum kvenna.

Hannes tók fram að umfjöllun um körfubolta skipti hreyfinguna gríðarlega miklu máli.

Víkurfréttir hafa lengi fjallað vel um körfubolta. Umfjöllunin í ár var þó framúrskarandi. Ítarleg umfjöllun um leiki, fjölmörg viðtöl og skemmtilegar vídeóklippur að ógleymdum sérlega glæsilegum ljósmyndum blaðamanna Víkurfrétta lyfti þeim skör hærra. Víkurfréttir sinntu öllum aldursflokkum á þessu tímabili til dæmis var bikarkeppni yngri flokka gerð mjög góð skil sem og mótum eins og Samkaupsmótinu.

KKÍ ákvað því að veita Víkurfréttum fjölmiðlaverðlaunin að þessu sinni.

(mynd: Snorri Örn Arnaldsson, http://www.flickr.com/photos/snorriorn)