Síðasta umferðin í Iceland Express deild kvenna verður leikin í kvöld. Allir leikirnir hefjast klukkan 19:15.

Það verður rosalegur leikur í Smáranum í kvöld þegar Breiðablik tekur á móti Hamri. Þetta er hreinn úrslitaleikur um sæti í Iceland Express deild kvenna á næsta ári. Leikir liðanna í vetur hafa verið spennandi en Breiðablik hefur sigrað 2 af 3 leikjum liðanna sem að búnir eru. Hamar sigraði fyrsta leikinn í Hveragerði stórt 84-59 en Breiðablik sigraði þann næsta í Smáranum 70-59. Breiðablik sigraði svo síðast þegar liðin mættust í Hveragerði 74-80.

Það verður því gaman að fylgjast með síðasta leik tímabilsins hjá þessum liðum en bæði liðin hafa tekið miklum framförum í síðustu leikjum.

Í Grindavík mætast UMF og ÍS. Þessi lið eru í 3. og 4. sæti deildarinnar og örugg um sæti í úrslitakeppninni. Síðasti leikur liðanna fór 47-67 fyrir UMFG.

Í Keflavík mætast toppliðin í deildinni þegar Haukar koma í heimsókn. Leikir liðanna í vetur hafa verið spennandi en Keflavík er eina liðið sem að hefur sigrað Hauka í vetur. Það var einmitt þegar liðin mættust síðast í Keflavík. Lokatölur þá voru 92-85.