Á sunnudag og mánudag verða undanúrslit í Lýsingarbikar karla og kvenna.

Spennan verður mikil á sunnudag og mánudag þegar leikið verður um réttinn að komast í Laugardalshöll laugardaginn 17. febrúar í stærstu einstöku leiki á hverju tímabili.

Hjá konunum verður alger stórleikur á dagskrá á sunnudaginn klukkan 17:00 í Grindavík þegar Íslandsmeistarar Hauka mæta í heimsókn. Það er óhætt að mæla með þessum leik þar sem þessi lið hafa verið að sýna frábæran körfubolta í vetur.

Hinn undanúrslitaleikurinn hjá konunum verður viðureign Keflavíkur og Hamars og fer sá leikur fram í Keflavík á mánudagskvöld klukkan 19:15. Það verður á brattann að sækja hjá gestunum en allt getur gerst í bikarkeppnum.

Báðir karlaleikir fara fram á sunnudagskvöld klukkan 19:15.

Athygli vekur að þetta eru sömu 4 lið og sömu 2 viðureignir og voru í undanúrslitum bikarkeppninnar árið 2001. Þá eins og nú áttust Grindvíkingar og ÍR við í Grindavík og Keflvíkingar öttu kappi við Hamarsmenn í Keflavík en leikurinn að þessu sinni fer fram í Hveragerði.

Það má búast við mjög fjörugum leikjum því það er mjög mikið undir. Staða liða í deildinni segir ekki svo mikið þegar komið er svona langt í keppninni eins og sannaðist 2001 þegar ÍR sigraði í Grindavík og Hamarsmenn sigruðu í Keflavík í framlengingu.

Hvað gerist 2007???