Stjörnuleikir KKÍ verða haldnir á morgun í DHL-Höllinni í Vesturbænum. Hátíðin hefst klukkan 14:00 með stjörnuleik kvenna þar sem að Iceland Express liðið tekur á móti Shell liðinu. Styrktaraðilar KKÍ hafa ákveðið að bjóða áhorfendum frítt á leikina.

Það verður eflaust mikið um flott tilþrif, troðslur og þriggja stiga skot í DHL-Höllinni á morgun. Eins og áður sagði þá hefja stelpurnar leikinn klukkan 14:00. Þar takast á tvö gríðarsterk lið, sem að eru skipuð sterkustu leikmönnum Iceland Express deildarinnar. Karlaleikurinn hefst svo klukkan 16:00 og þar mun úrvalslið íslenskra leikmanna leika gegn úrvalsliði erlendra leikmanna.

Þriggja stiga skotkeppnir verða á milli leikhluta og í hálfleik á báðum leikjum. Það verður gríðarlega spennandi að fylgjast með þeirri keppni enda mjög margar stórskyttur skráðar til leiks í keppnirnar.

Í einhverju leikhléi mun heppnum áhorfendum bjóðast að skjóta Bónusskotinu og þar með möguleiki á að vinna 20.000 króna útekt í Bónus.

Ljóst er að það verður margt skemmtilegt að sjá á morgun og hvetjum við alla til þess að mæta á skemmtilega leiki.