Um helgina var hið árlega hópbílamót Fjölnis í Grafarvoginum. Börn á aldrinum 6-11 ára léku þar körfuknattleiksleiki og tóku þátt í öðrum uppákomum sem tengjast mótinu. Mótið gekk mjög vel og var framkvæmd mótsins Fjölnismönnum til sóma.

Fastir liðir eins og bíóferðin, kjötbollurnar, blysförin, kvöldvakan hans Ragga Torfa, pizzuveislan, skúffukakan og verðlaunaafhendingin voru á sínum stað í dagskránni og gerðu mótið að vel heppnaðri blöndu af körfuknattleik og öðrum ljúfum og skemmtilegum samverustundum.

Hópbílamótið er frábær viðburður til að efla minniboltastarf á Íslandi. Það er ekki tilviljun að mörg þau félög sem eru með besta og öflugasta minniboltastarfið eru dugleg að nýta sér mótið og önnur svipuð mót til að efla starf sitt. Sérstaka athygli vakti stór hópur frá Kormáki og mjög öflugur kvennahópur frá Breiðablik. Hjá þessum liðum er verið að vinna gott starf um þessar mundir. Auk þessu voru stórir hópar frá Suðurnesjaliðunum, gestgjafanum Fjölni og fleiri félögum

Að þessu sinnu voru færri leikmenn á mótinu en síðustu ár. Að hluta til má skýra það með því að KKÍ hefur endurvakið Íslandsmót hjá 10 ára leikmönnum, fleiri mót eru komin fyrir yngstu minniboltaleikmenn og að minniboltastarf hjá sumum félögum er ekki nægjanlega öflugt.

Næstu mót í mótaröðinni þar sem stuðst er við sömu heimspeki og á Hópbílamótinu er Actavismót Hauka sem verður í lok desember, Skyrmót Breiðabliks í lok janúar og Samkaupsmótið í Reykjanesbæ í vor.