Forkeppni Lýsingarbikarsins lauk á miðvikudagskvöldið þegar Glóamenn sigruðu Leikni í Austurberginu 78-70 og var það sjónvarpsmaðurinn kunni Auðunn Blöndal sem kláraði leikinn fyrir Glóa með 8 vítum í lokin. En þess má geta að Auðunn varð Íslandsmeistari í 8. flokk með Tindastól árið 1994.

Glóamenn fá því lið KR b í heimsókn á laugardaginn. Í hinum leik forkeppninnar átti lið ÍBV að heimsækja Sindramenn á Hornafjörð en þeir náðu ekki að manna lið sitt í þeim leik og því komust Sindramenn í 32 liða úrslit án þess að keppa en þeir mæta Valsmönnum í næstu umferð.

32 liða úrslit keppninnar hefjast svo í kvöld með leik Þórs Ak og Fjölnis en á morgun eru svo 7 leikir og 32 liða úrslitum lýkur svo á sunnudag með 8 leikjum. Í næstu viku verður svo dregið í 16 liða úrslitin sem fara fram helgina 9. og 10. desember.