Í kvöld fara fram tveir leikir í Evrópukeppni félagsliða. Karlalið Njarðvíkur leikur gegn Tartu Rock frá Eistlandi og kvennalið Hauka leikur gegn Parma frá Ítalíu.


Í kvöld kl 19:15 mætast Njarðvík og Tartu Rock frá Eistlandi í þriðju umferð C riðils í Evrópukeppninni. Leikurinn fer fram á Sunnubraut í Keflavík.

Þeirra helsta stjarna er Martin Muursepp. Hann var valinn númer 25 í nýliðavali NBA árið 1996 af Utah Jazz. Hann lék svo með Miami, Dallas Mavericks og Phoenix Suns áður en hann fór til Evrópu og á síðustu árum hefur hann svo spilað í Grikklandi og Rússlandi þar sem hann hefur leikið með sterkum liðum sem hafa tekið þátt í ULEB Cup og Euroleugue.

Muursepp er 206 cm á hæð, sterkur í teignum og er jafnframt góður skotmaður. Hann hefur verið besti maður Eistneska landsliðsins mörg undanfarin ár og átti t.a.m. stórleik gegn íslenska landsliðinu fyrir fáum árum síðan þar sem hann gerði rúm 40 stig.

Í kvöld leika Haukastúlkur annan leik sinn á 3 dögum en þær eru á ferðalagi um suður Evrópu þessa dagana. Sl. mánudag léku þær gegn sterku liði Montpellier í Frakklandi sem tapaðist nokkuð illa þar sem Helena Sverrisdóttir skoraði 31 stig. Helena er sem stendur með 28 stig að meðaltali á leik og er næststigahæst yfir alla riðlana.

Leikurinn í kvöld er gegn liði Parma frá Ítalíu en með því liði leikur Megan Mahoney sem lék einmitt með Haukum í fyrra þegar liðið varð Íslandsmeistari. Hægt er að fylgjast með leiknum á fibaeurope.com