Helgi Ágústsson, sendiherra Íslands í Kaupmannahöfn og fyrrum formaður KKÍ, sendi KKÍ kveðju í tilefni af 40 ára afmæli sambandsins. Með kveðjunni fylgdi afmælisbragur sem sunginn var í hófinu á laugardaginn. Bragurinn fer hér á eftir.

Afmælisbragur KKÍ
Fluttur í 40 ára afmælishófi 24. febrúar 2001

Höf. Helgi Ágústsson
Lag: Í Hlíðarendakoti
____________________________


Fyrr var oft í körfu kátt
kappar léku saman
þá var löngum flautað hátt
tap var ekkert gaman
unnum leiki, unnum mót
vörn og sókn við efldum
þeim sem æfðu og gerðu bót
fram á völlinn tefldum.

Árin hafa liðið hjá
fjögra tuga að minnast
gaman væri að sitja á
barnum nú og kynnast
nýjum vinum, nýrri stund
nýjum kynnast vonum
eða þá sem alla stund
bjóða upp glæstum konum

Hjá KKÍ er kotið kátt
kokkteil hrista saman
allir þeir sem hafa átt
af körfubolta gaman
Því vill hvarfla hugurinn
heillavinir góðir
heim í gamla hópinn minn
heim á fornar slóðir.