Sterkustu landslið heims búa sig nú undir heimsmeistaramótið í Japan sem hefst næstkomandi laugardag. Það hafa verið leiknir æfingaleikir víðs vegar um heiminn seinustu vikurnar og eru liðin nú að leggja lokahönd á undirbúninginn fyrir mótið.

Þau lið sem hafa verið einna sterkust í þessum æfingaleikjum eru Spánn og Bandaríkin. Spánverjar hafa sigrað í 9 æfingaleikjum í röð og telja margir þá líklega til þess að komast langt í heimsmeistarakeppninni. Í gær unnu þeir Ólympíumeistara Argentínu 87-66 þar sem Juan Navarro skoraði 22 stig og Pau Gasol skoraði 13 og hirti 9 fráköst. Þetta er í annað sinn sem Spánverjar leggja Ólympíumeistarana að velli en þeir sigruðu þá einnig fyrir viku í Madrid.
Manu Ginobili, helsta stjarna Argentínu sagði fyrir skömmu að hann teldi Spánverja líklegasta til þess að sigra í heimsmeistarakeppninni.
Bandaríkjamenn hafa einnig verið að spila vel í sínum æfingaleikjum og hafa unnið þá stórt ef undan er skilinn leikurinn gegn Brasilíu.

Annars er helst að nefna að Þýskaland sigraði Kína þrátt fyrir að Yao Ming léki aftur með Kínverjum. Dirk Nowitzki skoraði 27 stig og tók 12 fráköst í leiknum. 16 af stigum hans komu í 4. leikhluta.

Slóð mótsins.