Íslenska 16 ára landslið kvenna tapaði með 51 stigi, 51-102, fyrir Búlgaríu í öðrum leik sínum í b-deild evrópumótsins í Jyvaskyla í Finnlandi. Afleit byrjun íslenska liðsins setti stelpurnar alveg út af laginu og þær réðu síðan ekkert við tvær stórskyttur Búlgara sem báðar skoruðu yfir 31 stig í leiknum. Lilja Ósk Sigmarsdóttir og Ragna Margrét Brynjarsdóttir voru stigahæstar með 12 stig en Kristín Fjóla Reynisdóttir var valin maður leiksins af mótshöldurum en hún skoraði 4 stig, tók 5 fráköst og gaf 5 stoðsendingar.

Búlgörsku stelpurnar skoruðu 16 fyrstu stig leiksins og voru 18 stigum, 7-25, yfir eftir fyrsta leikhluta. Annar leikhluti var mun skárri hjá íslenska liðinu en íslenska liðið var engu að síður 25 stigum undir í hálfleik, 21-46. Íslensku stelpurnar unnu fyrstu 2 mínútur seinni hálfleiks, 4-2, en þá komst búlgarska liðið aftur af stað, var komið 37 stigum yfir eftir þriðja leikhlutann, 36-73. Búlgaría vann leikinn að lokum með 51 stigi, 51-102. Tveir leikmenn búlgarska liðsins skoruðu saman 64 stig og 10 þriggja stiga körfur þar af skoraði önnur þeirra 28 af 33 stigum sínum í seinni hálfleik.

Allar stelpurnar fengu að spreyta sig í leiknum og átta af ellefu leikmönnum íslenska liðsins komust á blað. Annan daginn í röð var það leikmaður af bekknum sem var valinn maður leiksins af mótshöldurum en Kristín Fjóla Reynisdóttir stjórnaði sóknarleik íslenska liðsins af röggsemi og endaði með 4 stig, 5 fráköst og 5 stoðsendingar. Lilja Ósk Sigmarsdóttir fylgdi eftir góðum fyrsta leik og var með 12 stig og 6 fráköst og þá skoraði Ragna Margrét Brynjarsdóttir einnig 12 stig. Lóa Dís Másdóttir skoraði í kvöld sín fyrstu stig fyrir íslenska landsliðið en þurfti síðan að yfirgefa völlinn með fossandi blóðnasir. Lóa Dís er hörkutól og var búinn að ná sér í leikslok. Helena Hólm þurfti einnig að fara meidd af velli, meidd á fingri, en hún skoraði líkt og Ingibjörg Jakobsdóttir 7 stig í leiknum.

Atkvæðamestar hjá íslenska liðinu gegn Búlgaríu:
Lilja Ósk Sigmarsdóttir 12 stig (6 fráköst, hitti úr 3 af 7 3ja stiga skotum)
Ragna Margrét Brynjarsdóttir 12 stig (5 fráköst)
Ingibjörg Jakobsdóttir 7 stig (3 stoðsendingar)
Helena Hólm 7 stig
Gunnhildur Gunnarsdóttir 5 stig
Kristín Fjóla Reynisdóttir 4 stig (5 fráköst, 5 stoðsendingar)
Lóa Dís Másdóttir 2 stig (4 sóknarfráköst)
Hafrún Hálfdánardóttir 2 stig (7 fráköst)
Guðbjörg Sverrisdótttir, Klara Guðmundsdóttir og Salbjörg Sævarsdóttir spiluðu allar en skoruðu ekki.



Lilja Ósk Sigmarsdóttir er búin að skora 25 stig og taka 12 fráköst í fyrstu tveimur leikjum 16 ára liðsins í Finnlandi.