Skallagrímur tapaði heima fyrir Tindastól í dag eftir þríframlengdan leik. Þetta er aðeins í þriðja skiptið sem slíkt gerist í deildarkeppninni, og svo skemmtilega vill til að þetta er í annað skiptið sem þessi tvö lið taka þátt í slíkum leik. Þann 16. október 1988 unnu Haukar Tindastól fyrir norðan með 134 stigum gegn 141, en það er mesti skorleikur í sögu deildarinnar. Rúmum ellefu árum síðar, 17. október 1999, gerðist það svo að einn hálfleikur bættist við leik Skallagríms og KFÍ, en sá leikur var fjórframlengdur og endaði 129-132 fyrir KFÍ. Einu sinni hefur leikur verið þríframlengdur í úrslitakeppni úrvalsdeildarinnar, en það var 2. apríl 1999, þegar Keflavík og Grindavík öttu kappi á föstudaginn langa. Þeim leik lauk með sigri Keflvíkinga, 122-119.

Leikurinn í kvöld var bráðfjörugur og hélst spennandi allt til loka, en Skallagrímur tapaði honum með einu stigi, 114-115. Warren Peebles og Hlynur Bæringsson fóru mikinn fyrir heimamenn, Peebles skoraði 39 stig og gaf sjö stoðsendingar og Hlynur átti sannkallaðan stórleik, skoraði 25 stig, tók 26 fráköst (þar af 13 í sókn), gaf sjö stoðsendingar og stal boltanum sex sinnum. Hlynur jafnaði Shawn Myers og Calvin Davis í heildarjölda frákasta í einum leik á tímabilinu og þessi 13 sóknarfráköst eru það mesta sem leikmaður hefur náð í einum leik í vetur. Í liði Tindastóls voru Kristinn Friðriksson og Shawn Myers bestir, en Kristinn skoraði 31 stig, gaf sex stoðsendingar og stal fimm boltum, og Myers skoraði 22 stig, tók 22 fráköst, gaf átta stoðsendingar og stal fjórum boltum.

Keflavík sigraði Hamar í Hveragerði, 86-92, þar sem þrír menn náðu 20 stigum fyrir Keflavík. Gunnar Einarsson var stigahæstur með 25 stig og átta fráköst að auki, Guðjón Skúlason var með 24 og Calvin Davis skoraði 20 stig, tók tíu fráköst og varði fimm skot. Guðjón er nú kominn með ríflega 6000 stig á ferli sínum í úrvalsdeild, en hann er í þriðja sæti á eftir Teiti Örlygssyni, sem er einnig nýbúinn að rjúfa 6000 stiga múrinn, og Val Ingimundarsyni, sem er stigahæstur með 7221 stig. Chris Dade var að vanda stigahæstur Hamarsmanna með 36 stig og sjö stolna bolta að auki.

Þór tapaði heima fyrir ÍR, 81-89, en þrenna Maurice Spillers dugði þeim ekki til sigurs. Spillers skoraði 30 stig, tók 13 fráköst og gaf 11 stoðsendingar. Næstur í stigaskorun kom Einar Örn Aðalsteinsson með 19 stig. Eiríkur Önundarson var stigahæstur gestanna með 21 stig auk þess sem hann gaf sex stoðsendingar. Cedrick Holmes skoraði 16 stig og tók 12 fráköst og Hreggvið Magnússon skoraði einnig 16 stig.

Haukar sneru við blaðinu eftir fremur brösótt gengi að undanförnu og unnu topplið Njarðvíkur með níu stiga mun, 86-77. Mike Bargen var stigahæstu Hauka með 23 stig, Marel Guðlaugsson skoraði 18 stig og Guðmundur Bragason og Davíð Ásgrímsson skoruðu 12 stig hvor. Guðmundur var auk þess með 17 fráköst sem er hans besti árangur síðan 3. nóvember 1994, þegar hann lék með Grindavík, en það var einmitt í sigurleik gegn Haukum. Jes Hansen var atkvæðamestur í liði Njarðvíkur með 19 stig og 12 fráköst, en Logi Gunnarsson kom næstur með 16 stig. Þessi sigur Hauka hleypir spennu í toppbaráttuna, en Njarðvík, Tindastóll og Keflavík eru jöfn að stigum og KR er aðeins tveim stigum á eftir. Njarðvík á reyndar leik til góða gegn KFÍ.

KR sigraði Val á heimavelli, 78-62, í tilþrifalitlum leik. Stigahæstur KR var Ólafur Jón Ormsson með 22 stig og næstur kom Jón Arnór Stefánsson með 16 stig. Ekki er vitað um stigahæstu menn hjá Val að svo stöddu.

Leik KFÍ og Grindavíkur var frestað vegna veðurs.