Uppselt var á leik Skallagríms og Njarðvíkur í "Fjósinu" íþróttamiðstöðinni í Borgarnesi í gær. Alls voru áhorfendur um 650 í húsinu og var hver krókur og kimi troðinn af áhorfendum.

Sem kunnugt er sigruðu heimamenn í leiknum og jöfnuðu eivígið um Íslandsmeistaratitilinn, 1-1. Næsti leikur fer fram í Njarðvík á laugardaginn kl. 16:00. Fríar rútaferðir verða á leikinn frá Borgarnesi í boði Sparisjóðs Mýrarsýslu. Leikurinn verður sýndur beint á sjónvarpsstöðinni Sýn.

Eins og í Borgarnesi, er búist við fullu húsi áhorfenda, þeim sem áhuga hafa á að mæta á leikinn og upplifa stemmninguna beint í æð er bent á að mæta tímanlega í "Ljónagryfjuna".

Sjá nánar umfjöllun um leikinn á vef Skallagríms en þar eru ma. skemmtilegar myndir úr leiknum og vef Njarðvíkur þar sem meðal annars ágætir dómarar leiksins í gær, þeir Björgvin Rúnarsson og Erlingur Snær Erlingsson, fá hrós.