Pétur Hrafn Sigurðsson framkvæmdastjóri KKÍ sat nú um helgina aukaþing FIBA í München í Þýskalandi. Til þingsins var boðað einkum vegna hinna byltingarkenndu þróunar sem orðið hefur í keppni bestu félagsliða álfunnar, og klofnings bestu liðanna á milli SuproLeague deildar FIBA annarsvegar, og EuroLeague deildar á vegum samtaka nokkurra deilda í S-Evrópu hinsvegar sem nefnist ULEB.

Fréttatilkynningu um aukaþingið er að finna á heimasíðu FIBA, "fiba.com". Stjórn KKÍ hefur stutt FIBA í baráttu sinni við ULEB, en ljóst er að ályktun aukaþingsins er mun veikari en tilefni er til. Tók Pétur Hrafn til máls á þinginu og lagði til að mun lengra yrði gengið í orðalagi niðurstöðunnar.

Á aukaþinginu var fjallað um tillögu frá Körfuknattleikssambandi Litháen um svæðisskiptar deildir félagsliða í Evrópu, og byggist sú tillaga á reynslunni af NEBL (Nort European Basketball League), sem rekin hefur verið undir stjórn gamla NBA-leikmannsins Sarunas Marciulionis með góðum árangri. Ísland átti upphaflega aðild að NEBL í gegnum Norðurlandasamstarf, og bindur KKÍ miklar vonir við að tillögur Marciulionis geti gert íslenskum félagsliðum kleyft með raunhæfum hætti að taka þátt í keppni innan Evrópu.

Í þriðja lagi var fjallað um leiðir til að styrkja Evrópukeppni landsliða, og samþykkt ályktun um nauðsyn þess fyrir körfuknattleik í álfunni. Fram komu hugmyndir um að leika Evrópukeppnina í tveimur deildum - sem væri veruleg bylting frá núverandi fyrirkomulagi.

Að lokum var samþykkt ályktun um að vinna að stækkun þings FIBA með þeim hætti að félagslið, leikmenn, dómarar, þjálfarar og keppnisdeildir eigi aðild að þinginu, auk landssambanda hvers ríkis eins og nú er. Verður að telja þessar hugmyndir afrakstur af sáttaleið gagnvart þeim klofningi sem komið hefur upp innan raða hreyfingarinnar.