Eins og kunnugt er mætir íslenska landsliðið liði Makedóníu á miðvikudaginn kemur í Laugardalshöll. Leikurinn er síðasti heimaleikur Íslands í undanúrslitakeppninni að þessu sinni. Ljóst er að makedóníska liðið er mjög sterkt og verður því við ramman reip að draga eins og svo oft áður. Íslenska liðið, sem er í nokkurri endurnýjun þessi misserin, hefur þó verið í framför að undanförnu. KKÍ skorar á alla körfuknattleiksunnundur að fjölmenna í Höllina á miðvikudaginn og styðja við bakið á íslenska liðinu.

Makedónía er eitt af fyrrum ríkjum Júgoslavíu og þar ríkir mikil hefð fyrir körfuknattleik. Þeim hefur gengið vel sl. ár og komust þeir í úrslitakeppnina sem fram fór í Frakklandi sumarið 1999.

Lið Makedóníu er skipað mörgum góðum leikmönnum sem hafa leikið með mörgum af þekktari liðum Evrópu. Bakverðir þeirra eru sérlega öflugir og taka blaðamenn í Makedoniu svo sterkt til orða að þeir séu með bestu bakverði í Evrópu!! Eftir að hafa leikið gegn þeim einu sinni þá sáum við að það er ekki fjarri lagi.

Nánari upplýsingar um lið Makedóníu er að finna í samantekt Friðriks Inga Rúnarssonar um liðið í greinum.