Aganefnd KKÍ hefur dæmt Örvar Kristjánsson leikmann 1. deildar liðs Stjörnunnar í tveggja leikja bann, en Örvari var vikið af leikvelli í leik Stjörnunnar og Þórs Þ. 6. janúar sl. Örvar verður því ekki með Stjörnunni í leikjunum gegn Selfossi um næstu helgi og Hetti um aðra helgi.

Örvar fékk dæmdar á sig tvær tæknivillur í leiknum gegn Þór og þar með brottrekstrarvillu. Örvar var síðan kærður til aganefndar fyrir óprúðmannlega framkomu, óhæfileg mótmæli við dómara fyrir, í og eftir kappleik og ógnun eða árásir á starfsmenn leikja eða dómara fyrir, í eða eftir kappleik.

Aganefnd tók kæruna fyrir í gær, þar sem hún barst ekki vegna tæknilegra vandamála fyrir síðasta fund nefndarinnar, og niðurstaðan var tveggja leikja bann.

Tvö önnur mál voru tekin fyrir á fundi nefndarinnar í gær. Þeir Eiríkur Sigurðsson Stjörnunni og Jónas Ólason Breiðabliki voru báðir dæmdir í eins leiks bann vegna brottrekstarvillu sem þeir fengu dæmda á sig í leik Stjörnunnar og Breiðabliks í unglingaflokki karla 8. janúar sl. þeir lentu í stympingum í leiknum og hlutu að launum brottrekstrarvillu frá dómara leiksins. Þeir voru kærðir til aganefndar fyrir óprúðmannlega framkomu.

Leikbönn þessi taka gildi frá og með hádegi föstudaginn 19. janúar.