Ísland tapaði gegn Slóveníu í kvöld 50-68 eftir að leikar höfðu staðið jafnir 27-27 í hálfleik. Það var afleitur þriðji leikhluti sem varð íslenska liðinu að falli. Liðið gerði þá aðeins 3 stig gegn 25 og þar með voru úrslit leiksins ráðin ef svo má segja.
Leikurinn fór vel af stað og það var jafnræði með liðunum má segja allan fyrri hálfleik. Íslenska liðið leitaði mikið inn á Hjört Hrafn sem að var Slóvenunum erfiður. Það munaði þó miklu að Þröstur var ekki heill heilsu og gat lítið beitt sér sóknarlega. Hann stóð þó sína vakt í vörninni og fráköstunum.
Síðari hálfleikur fór ekki svo illa af stað. Besti leikmaður Slóvena fékk 2 villur á fyrstu mínútunni og var kominn með 4 villur en það var eins og íslenska liðið héldi að hlutirnir kæmu að sjálfu sér og framhaldið var algjört hrun. Mönnum virtist fyrirmunað að skora og í stað þess að halda uppteknum hætti frá því í fyrri hálfleik varnarlega þá fóru menn að svekkja sig og Slóvenar skoruðu auðveldar körfur.
Fjórði leikhluti rann svo í gegn án þess að íslenska liðið næði að ógna Slóvenum. Strákarnir sem komu inn af bekknum börðust þó að krafti og löguðu stöðuna en lokatölur eins og áður sagði 50-68.

Stig Íslands: Hjörtur Hrafn 14, Rúnar Ingi 10, Þröstur Leó 10, Snorri Páll 5, Arnar Freyr 4, Hjörtur Halldórs 3, Magni 2 og Elías 2.
Tölfræði leiksins

En það þýðir lítið að gráta þennan ósigur. Þriðja sætið í riðlinum er staðreynd og Ísland leikur því um 13.- 16. sætið.
Strákarnir leika við Belga í krossspili á laugardag kl 14 að íslenskum tíma og sigurvegarinn spilar svo um 13.- 14. sætið og heldur sæti sínu í A deild. Hinum megin mætast Grikkir og Pólverjar og teljast Grikkir nokkuð öruggir sigurvegarar þar.

Markmið íslenska liðsins fyrir mót var að halda sæti sínu í A deild, semsagt ná 14. sæti eða ofar. Með sigri á laugardag tekst það og nú kemur kærkomin hvíld á morgun og menn mæta ferskir í slaginn á laugardag, og klára verkefnið.