Ísland vann stórsigur á Möltu, 88-50, á Smáþjóðaleikunum í Andorra í dag. Stelpurnar tóku frumkvæðið strax í byrjun leiksins og sigurinn var aldrei í hættu.

Ísland hafði 19-13 yfir eftir fyrsta fjórðung en í þeim næsta tóku okkar stúlkur öll völd á vellinum og um unnu fjórðunginn með 14 stiga mun og höfðu þar með 20 stiga forystu í hálfleik 47-27. Eftir það var eftirleikurinn auðveldur.

Allir leikmenn íslenska liðsins lögðu sitt af mörkum með góðri frammistöðu og stigaskorið dreifðist nokkuð jafnt. Skotnýtingin var mun betri en í gær og tapaðir boltar voru færri.

Alda Leif Jónsdóttir var stigahæst með 18 stig, 6 stolnir og 4 fráköst, Signý Hermannsdóttir var með 14 stig og 4 fráköst, Hildur Sigurðardóttir 13 stig og 5 stolnir boltar, Helena Sverrisdóttir var með 12 stig 4 stolna og 4 stoðsendingar og Birna Valgarðsdóttir var frákastahæst með 11 fráköst og 6 stig.

Tölfræði leiksins.

Aðrar sem skoruðu í leiknum voru: María Ben Erlingsdóttir 8 stig og 7 fráköst, Ingibjörg Vilbergsdóttir 7 stig, Þórunn Bjarnadóttir 4 stig og 4 fráköst, Bryndís Guðmundsdóttir 3 stig og 6 fráköst, Rannveig Randversdóttir 2 stig og 5 stoðsendingar og Helga Þorvaldsdóttir 1 stig og 3 fráköst. Helga Jónasdóttir var óheppin með villur og fékk 5 villur á 6 mínútum.

Ísland leikur um gullið á morgun, en mótherjarnir verða Lúxemborg. Með góðum leik á íslenska liðið mjög raunhæfa möguleika á sigri.