Á fundi stjórnar KKDK, þriðjudaginn 5. apríl kl. 20:00, var samþykkt að falla frá kæru sem send var dómstól KKÍ í gær, vegna úrslita í leik Snæfells og Keflavíkur sl. mánudag.

Körfuknattleiksdeild Keflavíkur hefur af þessu tilefni sent frá sér neðangreinda yfirlýsingu:

"Körfuknattleiksdeild Keflavíkur metur það svo að það væri félagi okkar, Keflavík, og körfuboltanum í heild til framdráttar að draga kæruna til baka og einbeita okkur að baráttunni á leikvellinum. Sérstaklega í ljós þess tíma sem hugsanlegt er að þetta kæruferli gæti tekið og þess skað sem uppnám úrslitakeppninnar gæti valdið okkar frábæru íþrótt."

"Stjórn KKDK telur hinsvegar að kæra þessi hafi átt fullan rétt á sér og dregur á engan hátt úr þeirri skoðun sinni að umrætt mál er grafalvarlegt ekki aðeins fyrir sitt félag heldur hreyfinguna alla. Kæran er hinsvegar dregin til baka í þeirri trú að framkvæmd leikja í kjölfarið, jafnt hjá okkur sem hjá öðrum, verði með þeim hætti að allt mannlega mögulegt verði gert til að koma í veg fyrir að mistök sem þessi geti endurtekið sig."