FIBA Europe tilkynnti í morgun hvaða tólf leikmenn hafa verið valdir til að leika með Evrópuúrvalinu gegn heimsúrvalinu í stjörnuleik FIBA Europe á Kýpur 14. apríl nk. Alls taka 24 leikmenn frá 14 löndum þátt í leiknum.

Tíu leikmenn úr hvoru liði eru valdir af almenningi á netinu og tveir eru valdir beint af FIBA Europe. Jón Arnór Stefánsson verður fulltrúi Íslands í leiknum sem einn af bakvörðum Evrópuúrvalsins. Það má fullljóst vera að val Jóns Arnórs í Evrópuúrvalið er einhver mesta upphefð sem íslenskum körfuknattleiksmanni hefur hlotnast til þessa.

Í frétt á vef FIBA Europe af valinu segir meðal annars: "Fyrir liði Evrópu fara þeir Damir Mrsic stjarnan frá Bosníu & Herzegóvínu og landsliðsmennirnir Jón Stefánsson (Íslandi Dynamo St. Petersburg) og Kaspars Kambala (Lettlandi og UNICS Kazan)."

Lið Evrópu er annars skipað eftirtöldum leikmönnum:
Jón Arnór Stefánsson Ísland Dynamo St. Petersburg 22 ára 196 sm.
Damir Mrsic Bosnía & Herzegóvína Fenerbahce 34 ára 188 sm.
Lior Lubin Ísrael Azovmash 28 ára 192 sm.
Ömer Onan Tyrkland Fenerbahce 27 ára 188 sm.
Dimitar Angelos Búlgaría CSKA Sofia 25 ára 202 sm.
Michalis Kounounis Kýpur Lemesos 23 ára 194 sm.
Kresimir Loncar Króatía BC Kyiv 22 ára 210 sm.
Ioannis Giannoulis Grikkland BC Kyiv 29 ára 207 sm.
Kaspars Kambala Lettland INICS Kazan 26 ára 205 sm.
Radek Necas Tékkland CEZ Nymburk 24 ára 204 sm.
Ratko Varda Bosnía & Herzegóvína Besiktas 25 ára 213 sm.
Erez Markovich Ísrael Nahariya 27 ára 208 sm.

Þjálfari liðsins verður Aydin Ors frá Fenerbahce og aðstoðarþj´lafari verður Dragan Raca frá Lemesos.

Jón Arnór er eini fulltrúi Norðurlanda í liðinu og reyndar eini leikmaðurinn í liðinu frá V-Evrópu. Hann er jafnframt yngsti leikmaður liðsins ásamt Loncar frá Króatíu.