Um helgina hélt Körfuknattleiksdeild Fjölnis í samvinnu við Hópbíla ehf. stórmót fyrir yngstu iðkendur körfubolta þ.e.a.s. fyrir drengi fædda 1994 og síðar og stúlkur fæddar 1993 og síðar.

Mótið var haldið í íþróttamiðstöðinni Dalhúsum, í íþróttahúsi Rimaskóla og íþróttahúsi Borgarskóla. Um 500 keppendur léku á mótinu, þeir voru í 66 liðum frá 13 félögum. Leiknir voru 169 leikir á mótinu. Fyrir utan leikina var boðið upp á ýmsar skemmtilegar uppákomur.

Framkvæmd og skipulag mótsins var með ágætum hjá Fjölnismönnum og eiga þeir heiður skilinn fyrir það. Það er ljóst að Hópbílamótið og svipuð mót eru mikilvæg í mótahaldi körfuknattleiksins á Íslandi, m.a. vegna þess að aðrar boltagreinar bjóða upp á svipuð mót. Til þess að vera samkeppnisfær um að fá ung börn til að stunda körfu þá er nauðsynlegt að vera með svona mót.

Athygli vakti mikill fjöldi iðkenda í minniboltanum hjá Keflavík, KR og Fjölni, en þessi lið voru með um helming af mótsgestum. Einnig var góð þátttaka frá Njarðvík, Grindavík og Haukum. Einnig vakti athygli að liðin sem komu lengst að Hörður og Kormákur voru með mörg og góð lið. Ljóst er að starfið er til fyrirmyndar hjá þessum félögum og vonandi að önnur félag nái að efla starf sitt á næstunni.

Næstu stóru verkefnin fyrir leikmenn 10 ára og yngri verða KEA-skyr mót Breiðabliks í janúar á næsta ári og Samkaupsmótið í Reykjanesbæ í mars.