Allir helstu sérfræðingar í háskólakörfubolta í Bandaríkjunum eru einróma í því áliti sínu að Birmingham Southern College verði sigurvegari í Big South-deildinni í vetur. Skólinn, sem sigraði í deildinni í fyrra, er nú í fyrsta sinn fullgildur meðlimur í 1. deild NCAA og ætti því að eiga greiða leið í hina frægu úrslitakeppni háskólanna í mars, gangi spárnar eftir.

BSC var áður í NAIA-deild háskólakörfuboltans er hefur undanfarin a.m.k. tvö ár leikið í 1. deild NCAA-deildarinnar í deild sem kallast Big South. Nokkur ár tekur fyrir nýja skóla að verða fullgildur meðlimum og þrátt fyrir sigur í deildinni í fyrra gat BSC ekki leikið í NCAA úrslitunum. Á því ætti að verða breyting í ár.

Fróðlegt verður að fylgjast með Jakobi Sigurðarsyni landsliðsmanni í NCAA úrslitunum, en keppnin er með gríðarlegt sjónvarpsáhorf í Bandaríkjunum og víðar. Því miður hefur íslenskum sjónvarpsáhorfendum ekki staðið þetta efni til boða ennþá, en vonandi verður breyting þar á þegar íslenska þjóðin á þar verðugan fulltrúa.

Sérfræðingarnir, sem skrifa fyrir virt körfuboltatímarit og vefsíður í Bandaríkjunum, eru einnig sammála um að Jakob Sigurðarson sé besti leikmaður skólans og eitt blaðið telur hann vera besta skotmann deildarinnar og einn af fimm bestu erlendu leikmönnunum.