KKÍ gekkst í gærkvöldi fyrir móttökuhófi fyrir drengina í U-16 ára liðinu sem sigraði í sínum riðli í B-deild Evrópukeppninnar í Brighton á Englandi um helgina. Tekið var á móti liðinu í Leifsstöð í gær og síðan var haldið hóf í Íþróttamiðstöðinni í Laugardal.

Hannes Jónsson varaformaður KKÍ og Hannes Hjálmarsson framkvæmdastjóri KKÍ tóku á móti strákunum í Leifsstöð. Í hófinu í kjölfarið óskaði Hannes Jónsson strákunum, þjálfara þeirra Benedikt Guðmundssyni og fararstjóra, Birni Björgvinssyni formanni unglinganefdar KKÍ, til hamingju með árangurinn og færði þeim öllum blómvönd.

Björn Björgvinsson lýsti síðan ferðinni og hvernig strákarnir hefðu allir sem einn staðið saman jafnt innan sem utan vallar og þannig gert þennan árangur mögulegan. Hann sagði að drengirnir hefðu orðið landi og þjóð til mikils sóma með allri sinni framkomu og engin vandamál hefðu komið uppá þrátt fyrir erfiða ferð þar sem leiknir voru níu leikir á tíu dögum.

Ísland leikur í A-deild Evrópumóts U-16 ára landsliða á næsta ári, en þá verður liðið skipað leikmönnum fæddum 1989 og síðar.

mt: Sigurlið Íslands í B-deild Evrópukeppni U-16 ár landsliða pilta. Efri röð frá vinstri: Þröstur Leó Jóhannsson, Hafþór Júlíus Björnsson, Gústaf Hrafn Gústafsson, Sigurður Gunnar Þorsteinsson, Hörður Helgi Hreiðarsson, Hjörtur Hrafn Einarsson og Benedikt Guðmundsson þjálfari. Neðri röð frá vinstri: Hörður Axel Vilhjálmsson, Þórir Guðmundsson, Páll Kristinsson, Brynjar Þór Björnsson, Emil Þór Jóhannsson og Böðvar Sigurvin Björnsson.