Strákarnir í U16 áttu dúndur leik í dag þegar þeir unnu Austurríki sannfærandi 77-52. Liðið spilaði fanta vörn eins og á móti Ungverjalandi í fyrradag. Íslenska liðið byrjaði leikinn á krafti og náði snemma 14 stiga forskoti. Þá jafnaðist leikurinn og var munurinn 11 stig í hálfleik, 33-22. Strákarnir byrjuðu seinni hálfleik eins og þann fyrri og fór munurinn fljótlega upp í 20 stig. Andstæðingarnir voru þó ekki á þeim buxunum að gefast upp og gerði nokkrar atlögur að forskotinu en strákarnir héldu haus. Brynjar Björnsson var sem fyrr atkvæðamestur með 17 stig og næstur kom Hörður Axel Vilhjálmsson með 16. Sigurður Þorsteinsson átti einnig mjög góðan leik og var með 12 stig og 17 fraköst.

Strákarnir leika síðan við Íra annað kvöld en Írar héldu 3ja stiga sýningu þegar þeir lögðu Hollendinga í gær og eru sterkir fyrir utan 3ja stiga línuna.