Helena Sverrisdóttir leikmaður U-16 ára landsliðs stúlkna, sem nú tekur þátt í B-deild Evrópukeppninnar, er sannarlega að gera góða hluti í kepninni. Hún er efst stigum, fráköstum og stoðsendingum í allri B-keppni Evrópumótsins. Helena skoraði 37 stig í 68-64 sigri Íslands á Lettlandi í dag. Nánar um leikinn síðar.

Helena hefur skorað 30.6 stig, tekið 16,2 fráköst og gefið 5,2 stoðsendingar í þeim fimm leikjum sem lokið er. Íslenska liðið hefur unnið fjóra af þessum leikjum og tapað aðeins einum. Sannarlega glæsilegur árangur hjá liðinu, en íslenskt kvennalið hefur aldrei áður tekið þátt í Evrópukeppni.

Alls taka 17 þjóðir þátt í B-deildinni. Níu þjóðir leika í Rakvere í Eistlandi þar sem íslenska liðið leikur og átta þjóðir taka þátt í hinum riðlinum sem fram fer í Bosníu. Ísland er efst í riðlinum sem stendur, ásamt Litháen sem vann Svíþjóð í dag 62-60.