Í dag var dregið í Evrópukeppni félagsliða - FIBA Europe Cup - sem Keflvíkingar tóku þátt í á síðastliðnu keppnistímabili, og skráðu sig á ný til þátttöku nú. Dróst liðið nú á móti Bakken Bears frá Danmörku, Reims Champagne frá Frakklandi og CAB Madeira frá Portúgal, en þeir síðastnefndu voru einmitt mótherjar Keflavíkur í síðustu keppni.

Fulltrúar Keflavíkur voru viðstaddir dráttinn í München í Þýskalandi, og samkvæmt upplýsingum frá Hrannari Hólm f.v. formanni körfuknattleiksdeildar Keflavíkur eru leikdagar þannig að leikið verður heima gegn Reims þann 3. nóvember, þann 10. nóvember heima gegn Madeira, þann 18. nóvember heima gegn Bakken, þann 23. nóvember gegn Reims í Frakklandi, þann 7. desember gegn Bakken í Danmörku og þann 9. desember gegn Madeira í Portúgal.

Alls eru skráð 33 lið til keppni í FIBA Europe Cup, en í öll mót félagsliða á vegum FIBA Europe á næsta keppnistímabili eru skráð alls 130 lið frá 32 þjóðlöndum.