Hanna Hálfdanardóttir, leikmaður unglinga- og meistaraflokks kvenna hjá Haukum útskrifaðist með stúdentspróf frá Flensborgarskólanum í Hafnarfirði um nýliðna helgi. Hanna kláraði stúdentsprófið með glæsibrag á aðeins þremur árum og hlaut margskonar verðlaun fyrir frábæran námsárangur. Hanna hefur stundað nám sitt af mikilli einbeitingu og dugnaði, auk þess sem hún hefur æft og spilað körfubolta með Haukum af mikilli samviskusemi og myndarskap. Hún hefur reyndar ekki látið þar við sitja því auk þess að æfa og leika sjálf hefur hún séð um þjálfun yngri flokka hjá Haukum.

Hanna er dóttir Hálfdáns Markússonar, fyrrverandi leikmanns Hauka og íslenska landsliðsins, og Sóleyjar Indriðadóttur, sem sömuleiðis lét til sín taka á körfuboltavellinum á sínum tíma.