Varaforseti ÍSÍ, kæru þingfulltrúar og aðrir gestir.

Norðurlandameistarar U16 kvenna, Ísland á Eurobasket, Jón Arnór Stefánsson íþróttamaður ársins, Pétur Guðmundsson tekinn inn í heiðurshöll ÍSÍ, karlalandsliðið lið ársins, já viðburðarríkt og sögulegt starfsár í íslenskum körfubolta er að baki.

Við erum afar stolt af árangri landsliða okkar undanfarin ár. Árið 2014 var um margt sögulegt, stelpurnar í U16 urðu Norðurlandameistarar og karlalandsliðið tryggði sig inná stórmót í fyrsta sinn í sögunni eins og við öll vitum. Eins og árið í fyrra var glæsilegt verður árið í ár enn glæsilegra. 10 landslið verða í eldlínunni í sumar og haust og framundan er okkar stærsta landsliðsár frá upphafi. U20 kvenna tekur nú í fyrsta sinn þátt í Norðurlandamóti, U16 og U18 fara í Evrópukeppni, karlalandsliðið stígur á stóra sviðið í Berlín í september. Strákarnir okkar eru í einum sterkasta riðli sem keppt hefur verið í sögu keppninnar. Íslenskir stuðningsmenn ætla ekki að láta sitt eftir liggja og má búast við á milli 800-1000 Íslendingum í O2 Arena í Berlín.

Verið er að taka upp nýtt keppnisfyrirkomulag hjá FIBA í Evrópukeppni kvenna nú í haust og keppa okkar stelpur nú í fyrsta inn í landsliðsgluggum inn á miðju keppnistímabili. Frá og með haustinu 2017 mun sama keppnisfyrirkomulag vera tekið upp hjá karlalandsliðinu.

Þetta hefur verið eitt af baráttumálum okkar hjá KKÍ innan FIBA á undanförnum árum og fögnum við þessu mjög.

Eins og oft áður fer mikill tíma stjórnarmanna og starfsmanna KKÍ í að afla fjár svo hægt sé að halda úti öflugu starfi og þannig að körfuboltinn í landinu blómstri sem best. Mikil vinna hefur farið í að afla nýrra samstarfsaðila og er ánægjulegt að þeim fjölgaði hjá okkur á síðasta ári. Eins og sést á reikningum síðasta árs tókst að greiða niður töluvert af skuldum sambandsins og fjárstreymið hefur lagast til muna. Stefnt er að því að sambandið verði orðið skuldlaust í árslok 2017.
Með nýjum samstarfsaðilum hefur KKÍ getað afhent aðildarfélögum sínum rúmlega 5000 bolta á síðustu árum og í vetur voru rúmlega 3000 treyjur afhentar öllum sem tóku þátt í Íslandsmóti yngri flokka.

Mótahald KKÍ er eitt það umfangsmesta á landinu og einn mikilvægasti þátturinn í starfi sambandsins og félaganna. Eins og allir vita var veðrið ekki að hjálpa okkur nú í vetur og má segja að veturinn einn sá erfiðasti á seinustu árum en þrátt fyrir veður og færð má segja að allt hafi gengið upp.
Í ár breyttum við út af venjunni með bikarúrslit yngri flokka og voru þau keyrð samhliða bikarúrslitum meistaraflokkanna í Laugardalshöll. Fengu því öll lið í bikarúrslitum allra flokka sömu umgjörð og tókst það mjög vel.

Mikið verk hefur verið unnið í fræðslu-og útbeiðslumálum. Það fengust styrkir til að ráða verkefnisstjóra tímabundið í að sinna þessum málum. Stærsta verkefnið er vinna við nýja þjálfaramenntun sem mun klárlega efla okkar faglega starf. Svo er það útbreiðsla á okkar frábæru íþrótt með félögunum okkar og einnig að aðstoða ný félög við að koma körfubolta á laggirnar.

Þingið okkar sem nú er að hefjast er mjög starfsamt þing þar sem margar tillögur liggja fyrir. Margar af þeim tillögum sem hér liggja fyrir varða málefni sem mikið hefur verið rætt um á undanförnum árum. Stærsta málið sem liggur fyrir þessu þingi eru tillögur er snúa að yngri flokka starfinu, það hefur verið í umræðunni í nokkur ár að breytinga sé þörf. Í haust var boðað til málþings um málefni yngri flokka, starfshópur skipaður sem fór yfir málin, fræðslunefnd sambandsins og þjálfarafélagið hafa farið yfir þessi mál. Nú er komið að því fara ræða þessar tillögur hér á þinginu og taka afstöðu til þeirra. Það lítur út fyrir að útlendingamálin séu því miður enn einu sinni „heitasta“ málið, við þurfum saman sem hreyfing að þroskast í þá átt að þessi málaflokkur sé ekki alltaf í brennidepli þegar körfuknattleiksþing kemur saman.

Þingið er rétti vettvangurinn til að ræða öll mál og taka ákvörðun með hagsmuni heildarinnar að leiðarljósi. Bið ég þingfulltrúa að hafa skoðun á málunum, koma þeim á framfæri og taka virkan þátt í umræðum í þingnefndum.

Að lokum langar mig að þakka stjórnarmönnum, starfsmönnum og nefndarmönnum KKÍ fyrir þeirra góðu störf og þann mikla tíma sem þau inna af hendi til að halda úti því mikla starfi sem fram fer á vegum KKÍ.

Kæru þingfulltrúar stjórn og starfsmenn KKÍ þakka ykkur og öllum sem starfa við körfuboltann hringinn í kringum landið fyrir gott samstarf við að efla og styrkja körfuboltann í landinu.

Þið forsvarsmenn félaganna og aðrir sem koma að vinnu með ykkur í ykkar félögum með einum eða öðrum hætti vinnið óendanlega sjálfboðavinnu fyrir oft litlar eða engar þakkir. Störf ykkar eru samfélaginu öllu mjög mikilvæg og er stjórn og starfsmenn KKÍ ykkur afar þakklár fyrir að þið gefið ykkur tíma til að sinna körfuboltanum í landinu – takk kærlega fyrir ykkar frábæru störf.

Óska ég okkur öllum velfarnaðar í þingstörfum.