Skallagrímur varð á föstudaginn deildarmeistari í 1. deild karla eftir 79-69 sigur á Stjörnunni í hörkuleik í Borgarnesi. Eftir leikinn afhenti Ólafur Rafnsson formaður KKÍ Skallagrímsmönnum sigurlaunin í deildinni.

Skallagrímsmenn stefna ótrauðir á að endurheimta sæti sitt í úrvalsdeild og hafa aðeins tapað einum leik í deildinni í vetur. Það var reyndar í 1. umferð gegn Val á Hlíðarenda, en síðan hafa Borgnesingarnir unnið sextán leiki í röð. Lokaleikur Skallagríms í deildinni verður nk. laugardag gegn liðinu í öðru sæti deildarinnar, Fjölni. Leikurinn verður í Grafarvogi kl. 17:00.