Fyrirhugað er að halda körfuboltamót fyrir körfuboltafólk sem orðið er eldra en 30 ára. Markmið mótsins eru fyrst og fremst að ná saman áhugasömum körfuknattleiksiðkendum og að gera sér glaðan dag saman.

Eftir að lávarðadeildin sáluga lagðist af hafa verið fá tilefni til að bregða sér bæjarleið í keppnis- og skemmtiferðir. Hér innanlands að minnsta kosti. Nú gefst tækifæri til að krydda tilveruna með heimsókn í Skagafjörð.

Mótið verður haldið í byrjun Sæluviku, laugardaginn 24 apríl og því nokkuð öruggt að það verður mikið um að vera í menningar- og skemmtanalífinu. Ennþá liggur ekki fyrir hvernig fyrirkomulag mótsins verður en skýrt verður nánar frá því þegar nær dregur og upplýsingar liggja fyrir um þátttöku

Keppt verður í bæði karlaflokki og kvennaflokki og verður mótsgjaldi stillt í hóf.

Reiknað er með því að keppnin fari fram á laugardegi og síðan haldi hópurinn sameiginlega “uppskeruhátíð” þar sem verðlaun verða veitt fyrir frammistöðu helgarinnar, snæddur kvöldverður og dansað fram á nótt við undirleik stórhljómsveitar Geirmundar Valtýssonar í íþróttahúsinu.

Skráning fer fram á vef Molduxa, sem opnaður var í tilefni af mótinu. Lið eru hvött til að skrá sig hið fyrsta svo hægt verði að flytja sem best fréttir af undirbúningi mótsins. Gæta þarf að því að við skráningu komi fram nafn liðs og einnig upplýsingar um tengilið s.s. nafn, símanúmer og netfang.

Molduxar hvetja áhugasama til að kanna með gistingu hið fyrsta og bjóðast einnig til að verða mönnum innan handar við að afla upplýsinga um gistingu sé þess óskað.