Vlade Divac miðherji Sacramento Kings hefur tilkynnt að hann treysti sér ekki til að leika með landsliði Serbíu og Svartfjallalands á Ólympíuleikunum í Aþenu í sumar. Hann segir að langt keppnistímabil og fjöldi leikja í NBA-deildinni sé farið að taka verulega í líkamlega. Divac, sem verður 36 ára þann 3. febrúar nk., hefur stundum áður sleppt því að leika með landsliðinu vegna álags.

Divac gaf það út eftir tapleikinn gegn Dallas Mavericks um síðustu helgi að hann hefði gefið landsliðinu allt sitt í gegnum tíðina, en nú væri hann að niðurlotum kominn vegna þreytu og álags. Hann sagði jafnframt að bestu miðherjar landsins ættu að vera í landsliðinu og þessa stundina væri hann ekki einn þeirra. Hann benti á þá Zeljko Rabraca (Detroit Pistons), Predrag Drobnjak ( LA Clippers) og Darko Milicic (Detriot Pistons) í sinn stað í liðið.

Talsverð umræða hefur verið um þátttöku evrópskra NBA-leikmanna í verkefnum landsliða sinna á sumrin og hafa eigendur nokkurra NBA-liða, þar á meðal Dalls Mavericks og Sacramento Kings, af því þungar áhyggjur. Þeir vilja meina að þeir fái leikmennina örþreytta til baka á haustin eftir landsliðsverkefnin. Þeir séu því ekki tilbúnir til að leika 82-100 leiki í NBA-deildinni af fullri getu án þess að fá hvíld yfir sumartímann og benda á lakari tölfræði nokkurra leikmanna í því skini.