Körfuknattleikssamband Íslands og Advania hafa gert með sér samstarfssamning til þriggja ára. Markmiðið er að efla körfuknattleiksíþróttina á Íslandi og auka útbreiðslu hennar.

„Það er mikilvægt fyrir okkur í íþróttahreyfingunni að hafa öfluga samstarfsaðila eins og Advania enda hjálpa þeir okkur við að gefa okkar afreksfólki tækifæri hér heima og á stórmótum erlendis. Framundan er eitt stærsta landsliðsár KKÍ frá upphafi og því er þessi samningur sérstaklega mikilvægur. Við hjá KKÍ erum ánægð og stolt að Adavania hefur ákveðið að vinna með okkur næstu árin“ segir Hannes S. Jónsson formaður KKÍ.

Með samstarfinu mun KKÍ geta nýtt sér fjölbreytta þjónustu Advania í upplýsingatækni á öllum sviðum eins og hugbúnaðar, vélbúnaðar og ráðgjafar.

„Eins og alþjóð veit tryggði karlalandslið í körfubolta sér réttinn til að keppa á meðal þeirra bestu á lokamóti EuroBasket 2015 sem haldin verður í Berlín næsta haust. Við viljum gjarnan spila með þeim bestu og því er það ánægjulegt að gera þennan samning við KKÍ,“ segir Gestur G. Gestsson forstjóri Advania.