Á morgun, laugardag, verður dregið í riðla í Evrópukeppni landsliða. Drátturinn fer fram í Belgrad í Serbíu og hefst kl. 11.00 að íslenskum tíma. Hægt verður að fylgjast með drættinum beint á netinu á heimasíðu FIBA - Europe. Að sjálfsögðu mun KKI.IS birta frétt um hverjir verða mótherjar Íslands um leið og það liggur fyrir. Leikirnir í riðlakeppninni munu fara fram í september 2004 og 2005.

Þjóðum í Evrópukeppni landsliða er skipt niður í tvær deildir og er skiptingin fundin út með því að reikna út stöðu þjóðanna miðað við árangur þeirra í Evrópukeppninni síðustu 10 árin. Samkvæmt þeim útreikningum er Ísland í 30 sæti í styrkleikaröðinni í Evrópu og í B-deild. 19 þjóðir skipa A-deildina en auk þeirra eru 5 sterkustu þjóðirnar sem taka ekki þátt í riðlakeppni A-deildar heldur komast beint í úrslitakeppnina.

Þjóðunum í A-deild og B-deild Evrópukeppninnar er svo skipt upp í styrkleikaflokka og er þar miðað við árangur í síðustu Evrópukeppni. Þá komst Ísland ekki áfram og er því í þriðja styrkleikaflokki B-deildar.

Styrkleikaskiptingin er eftirfarandi í B-deildinni:
1. Makedónía, Rúmenía, Írland, Hvíta-Rússland.
2. Sviss, Danmörk, Kýpur, Georgía.
3. Ísland, Slóvakía, Austurríki, Finnland.
4. Lúxemborg, Malta, Albanía, Azerbajan.

Þægilegast væri að lenda á móti Írlandi, Danmörku og Lúxemborg en lítill áhugi er á að fara til Hvíta-Rússlands, Georgíu og Azerbajan.
Leikið verður í fjórum fjögurra liða riðlum og munu sigurvegarar riðlanna leika heima og heiman um tvö laus sæti í A-deildinni.

Styrkleikaskitpingin í A-deildinni er eftirfarandi:
Grikkland, Ítalía, Litháen, Serbía-Montenegro og Spánn fara beint í úrslitakeppnina sem verður haldin í Serbíu í lok september 2005.

1. Frakkland, Ísrael, Rússland, Þýskaland, Tyrkland.
2. Króatía, Slóvenía, Lettland, Úkraína, Bosnía og Herzegovína.
3. Svíþjóð, Ungverjaland, Eistland, Búlgaría og Tékkland.
4. Pólland, Belgía, Holland og Portúgal.

Lið í sama styrkleikaflokki geta ekki lent saman í riðlakeppninni.