Ingvaldur Magni Hafsteinsson leikmaður KR sló metið yfir flest varin skot í einum leik gegn Þór Þ. í gær þegar hann varði 11 skot Þórsara. Fyrra metið áttu þeir Mike Bergen Haukum og Michail Antropov Tindstóli, en þeir vörðu 10 skot.

Auk þess skoraði Magni 13 stig og tók 11 fráköst í leiknum, þannig að hann var með þrefalda tvennu í leiknum. Það var Óskar Ó. Jónsson, sérfræðingur í tölfræði körfknattleiks á Íslandi, sem tók saman tölfræði leiksins í gær og því óhætt að treysta á að þessar tölur eru réttar.

Magni er kominn í 8. sæti á lista þeirra sem varið hafa flest skot á ferlinum, með 124 varin skot í 91. leik í úrvalsdeild, en efstur trónir Alexander Ermolinski sem varði 347 skot í 244 leikjum. Þess má geta að Magni spilaði einungis 27. mínútur í leiknum og hvíldi allan fjórða leikhluta.

Hægt er að skoða hvaða leikmenn hafa varið flest skot í deildinni ásamt annarri tölfræði frá upphafi úrvalsdeildar.

Ath. Ekki var farið að skrá varin skot fyrr en tímabilið 1995-96, en önnur tölfræði er frá 1988-89, en fyrir þann tíma er bara stigaskor og vítanýting.