Þriðju umferð INTERSPORT-deildarinnar lýkur í kvöld með þremur leikjum. Einu liðin sem taplaus eru í deildinni leika á heimavelli, UMFG gegn KFÍ og Þór Þ. gegn UMFN. Þá tekur Keflavík á móti Breiðabliki. Allir leikirnir hefjast kl. 19:15.

Á sunnudaginn hefst síðan 4. umferð INTERSPORT-deildarinnar með fimm leikjum og sá sjötti er á mánudag. Helgin framundan er fjörug eins og flestar helgar frá október fram í apríl. Alls eru 35 deildarleikir á dagskrá um helgina.

Engin fjölliðamót eru um helgina, en undanfarnar þrjár helgar fór 1. umferð yngri flokka mótanna fram. Alls fóru fram 30 mót síðustu þrjár helgar. Önnur umferð hefst 1.-2. nóvember og líkur 15. og 16. nóvember. Gera má ráð fyrir að þá fari fram 40 mót með alls um 400 leikjum.