Forseti Íslands Hr. Ólafur Ragnar Grímsson og eiginkona hans Dorrit Moussaieff verða heiðursgestir á leik meistara meistaranna í karlaflokki sem fram fer í Keflavík kl. 19.15 næstkomandi sunnudagskvöld. Þar mæta Keflvíkingar Snæfelli úr Stykkishólmi um titilinn Meistarar meistaranna. Kvennaleikurinn fer fram kl. 17.00 í Keflavík. Þar mæta Keflvíkingar liði ÍS um titilinn Meistarar meistaranna. Heiðursgestir verða þær Kristín Jóna Grétarsdóttir og Freyja Haraldsdóttir.

Allur ágóði af leikjunum rennur til góðgerðarmála. Í þetta sinn rennur styrkurinn til Einstakra barna en það er félag til stuðnings börnum með sjaldgæfa, alvarlega sjúkdóma.