Fimm úrslitaleikir fara fram í Laugardalshöllinni á morgun sunnudag en seinni helgi úrslitanna hjá yngri flokkunum er nú í fullum gangi. Eftir undanúrslitaleiki dagsins er orðið ljóst hvaða lið leika í úrslitaleikjunum morgundagsins en fjörið hefst klukkan 10 með úrslitaleik í 9. flokki karla. Auk þriggja úrslitaleikja hjá 9. flokki karla, 11. flokki karla og 10. flokki kvenna þá fara fram úrslitaleikir í hjá B- (gamli unglingaflokkurinn) og C-liðum (gamli 1. flokkurinn) í 2. deild karla.

Fyrsti úrslitaleikurinn er klukkan 10:00 en þá berjast Njarðvík og Fjölnir um Íslandsmeistaratitlinn í 9. flokki karla. Njarðvík vann Keflavík, 42-33, í undanúrslitunum en Fjölnir komst í úrslit annað árið í röð og í þriðja skiptið á fjórum árum með 61-46 sigri á KR. Liðin mættust einnig í bikarúrslitaleiknum í mars og þá hafi Njarðvík betur, 58-51, en Fjölnisstrákarnir eru ríkjandi Íslandsmeistarar í þessum flokki.

Klukkan 11:45 hefst leikur ÍR og Fjölnis um Íslandsmeistaratitlinn í 11. flokki karla. ÍR vann KR, 85-63, í undanúrslitunum en Fjölnir komst í úrslit annað árið í röð og í þriðja skiptið á fjórum árum með 76-62 sigri á Þór frá Akureyri. Njarðvíkingar hafa unnið Íslandsmeistaratitilinn í þessum aldursflokki frá því í 7. flokki (4 ár í röð) en þeir komust ekki í lokaúrslitin í ár.

Þriðji úrslitaleikur dagsins er milli Hauka og Keflavíkur um Íslandsmeistaratitlinn í 10. flokki kvenna. Haukastelpur unnu Kormák, 68-30, í undanúrslitunum og Keflavík komst í úrslit með 31-15 sigri á Skallagrími. Haukastúlkur geta varið Íslandsmeistarartitlinn, bæði í þessum flokki sem og í þessum árgangi en Haukar unnu bæði 9. og 10. flokk kvenna í fyrra.

Síðustu tveir úrslitaleikir dagsins eru í 2. deild karla. Klukkan 15:30 berjast Njarðvík og KR um sigurinn hjá B-liðum og klukkan 17:30 leika Ármann/Þróttur og Breiðablik til úrslita hjá C-liðum. Keppni B-liða er gamli unglingaflokkurinn (með liðstyrk) en C-liðin voru 1. flokkur fyrir breytingar.