Keflavík varð í kvöld Íslandsmeistari í körfubolta karla í sjötta sinn frá upphafi eftir 97-102 sigur á Grindavík í þriðja úrslitaleik liðanna í lokaúrslitum Intersportdeildarinnar. Keflavík var einnig Íslandsmeistari 1989, 1992, 1993, 1997 og 1999.
Tveir menn hafa verið með í öllum sex Íslandsmeistaratitlunum, þjálfarinn Sigurður Ingimundarson og fyrirliðinn Guðjón Skúlason. Keflavík vann sjö síðustu leiki sína í úrslitunum og alls átta af níu leikjum sínum í úrslitakeppninni í ár. Keflavík vann auk þess alla fimm úrslitaleiki sína í ár, Grindavík, 75-74, í úrslitum Kjörísbikarkeppninnar, Snæfell, 95-71, í bikarúrslitaleiknum og Grindavík síðan þrisvar, 94-103, 102-113 og 97-102 í úrslitaleikjum Íslandsmótsins.

Keflavík er þar með tvöfaldur Íslandsmeistari í ár því kvennaliðið varð Íslandsmeistari fyrrir rúmri viku. Þetta er í fjórða sinn frá árinu 1989 sem Keflavíkingar vinna tvöfalt en það gerðu þeir einnig 1989, 1992, 1993 og svo í ár. Þetta er ennfremur í tíunda sinn sem sama félag vinnur báða Íslandsmeistaratitlana en ÍR (1957, 1963, 1970, 1972 og 1973) og KR (1979) hafa einnig unnið tvöfalt. Bæði Keflavíkurliðin unnu alla þrjá leiki sína í lokaúrslitunum og léku þar eftir afrek sitt frá 1993.

Edmund Saunders hjá Keflavík var án efa besti leikmaður lokaúrslitanna en kappinn var með 33,3 stig að meðaltali auk þess að taka 11,3 fráköst, senda 5,7 stoðsendingar og verja 2,7 skot að meðaltali. Saunders var einnig með frábæra nýtingu en hann nýtti 42 af 61 skoti sínu í leikjum þremur og var með 68,9% skotnýtingu í einvíginu. Félagi hans Damon Johnson skilaði einnig stórum tölum en hann skoraði 28,3 stig, gaf 8,7 stoðsendingar, tók 6,3 fráköst og varði 3 skot að meðaltali í leikjunum þremur. Þá var Darrel Lewis hjá Grindavík með 33 stig, 11 fráköst og 7,7 stoðsendingar að meðaltali auk þess að nýta 89,7% víta sinna (26 af 29).

Keflvíkingar nýttu 58,5% skota sinna í einvíginu, 56,9% í fyrsta leik, 61,1% í öðrum leik og 57,4% skotanna í kvöld og sex leikmenn liðsins nýttu meira en helming skota sinna í úrslitaeinvíginu.

Leikmenn með betri en 50% nýtingu í einvígi Grindavíkur og Keflavíkur 2003:
68,9% Edmund Saunders, Keflavík (42 af 61)
65% Gunnar Einarsson, Keflavík (13 af 20)
60% Magnús Þór Gunnarsson, Keflavík (12/20)
60% Jón Nordal Hafsteinsson, Keflavík (6/10)
54,8% Damon Johnson, Keflavík (34/62)
53,9% Falur Harðarson, Keflavík (7/13)
50% Nökkvi Már Jónsson, Grindavík (2/4)

Aðeins einn leikmaður hefur skorað fleiri stig að meðaltali í lokaúrslitum um Íslandsmeistarabikarinn heldur en Keflvíkingurinn Edmund Saunders en það er Hermann Myers sem gerði 38,0 stig að meðaltali í þremur leikjum með Grindavík 1997. Darrel Lewis Grindavík var aðeins einu stigi á eftir Saunders og er þriðji á listanum og stigin 28,3 sem Damon Johnson hjá Keflavík skoraði í leik er sjöunda besta meðalskorið frá upphafi.

Flest stig að meðaltali í lokaúrslitum um Íslandsbikarinn:
38,0 Hermann Myers, Grindavík 1997 (114 stig/3 leikir)
33,3 Edmund Saunders, Keflavík 2003 (100/3)
33,0 Darrel Lewis, Grindavík 2003 (99/3)
32,0 Jonathan Bow, Keflavík 1993 (96/3)
31,7 Petey Sessoms, Njarðvik 1998 (95/3)
28,6 Brenton Birmingham, Njarðvík 1999 (143/5)
28,3 Damon Johnson, Keflavík 2003 (85/3)

Keflavíkurliðið setti stigamet í lokaúrslitum úrslitakeppni úrvalsdeildar karla með því að skora 106 stig að meðaltali í leik og bættu þar með sitt eigið met frá árinu 1997. Grindavíkurliðið er hinsvegar það lið sem hefur skoraði flest stig að meðaltali af þeim liðum sem hafa þurft að sætta sig við silfrið.Grindvíkingar áttu þar einnig gamla metið.

Besta meðalskor í lokaúrslitum um Íslandsbikarinn:
106 Keflavík 2003 (318 stig / 3 leikir)
104,3 Keflavík 1997 (313/3)
100,7 Keflavík 1993 (302/3)

Besta meðalskor silfursliðs í lokaúrslitum um Íslandsbikarinn:
97,7 Grindavík 2003 (293/3)
93,3 Grindavík 1997 (280/3)
92,5 Grindavík 1995 (555/6)