Stjórn KKÍ hefur ákveðið að draga íslenska drengjalandsliðið út úr Evrópukeppni drengjalandsliða. Mótið á að fara fram í Tyrklandi dagana 17. - 21. apríl næstkomandi. Niðurstaða stjórnar KKÍ, að höfðu samráði við foreldra drengjanna, er að miðað við þær aðstæður sem nú ríkja í þessum heimshluta sé ekki forsvaranlegt að senda liðið til keppni.

Íslenska liðið var búið að vinna sér rétt til þátttöku í undanúrslitariðli Evrópumótsins og er það aðeins í þriðja sinn sem íslenskt landslið hefur náð slíkum árangri. Það eru því mikil vonbrigði að til þess þurfi að koma að liðið sé dregið út úr mótinu.

Ísland óskaði eftir því við FIBA að mótið yrði fært frá Tyrklandi í ljósi stríðsins í Írak. Viðbrögðin hafa verið þau að mótið var fært frá borginni Adana í suðausturhluta Tyrklands til borgarinnar Izmir sem er í vesturhlutanum og lengra frá átakasvæðunum í Írak.

Stjórn KKÍ telur þessa niðurstöðu ekki fullnægjandi og hefur því ákveðið að draga liðið úr keppni.